Ĉu ĉiuj truoj estas nigraj?

Tomato.

Ĉu estas truoj ruĝaj?

Tomato.

Ĉu jen unu el tiaj truoj?

Tomato.

La ĉefa trajto de nigraj truoj estas tio,
ke ili glutas ĉion kaj sputas nenion.
Tial ili estas nigraj. Simple ili ne lumas.
Kaj kio estas la ĉefa trajto de ruĝaj truoj?

Tomato.

Ili ankaŭ glutas, sed ne ĉion.
Kion ili glutas, se ne ĉion?
Ion kio kaŭzas, ke ili estas ruĝaj.
Aŭ ili glutas ĉion, sed ion sputas.
Tial ili lumas. Ruĝe. Kio tio povas esti?

Tomato.

Ĉu tio estas Ruĝaj Kapuĉetoj? Amasoj da Ruĝaj Kapuĉetoj?

Tomato.

Do tio ne estas Ruĝaj Kapuĉetoj.
Tio ne estas ankaŭ armeoj da Sanktaj Nikolaoj.
Nek stakoj da muŝoamanitoj.
Nek nuboj de kokcineloj.
Nek iu giganta rastrumero.
Tamen io tio estas.

Tomato.

Ĉu gravas kio?

Tomato.

Truo estas truo. Nenio plu.

Tomato.

Malinteresinda. Truo aŭ makulo?

Tomato.

Rektangula? Plata? Glata?

Tomato.



Jen simpla ludo iam populara kaj ŝatata de infanoj de ŝtatoj kaj landoj najbaraj. Ĉu nunaj infanoj scipovas ludi ĝin? Mi ne scias. Tempoj ŝanĝas sin rapide, ankaŭ ludoj sin ŝanĝas. Nu, unu ludanto demandas aliajn ludantojn. Demandoj estas diversegaj, dum la respondo devas esti daŭre la sama: TOMATO. La demandanto provas ridigi la demandatojn, dum ili provas respondi serioze. TOMATO estas la truo kiu ensuĉas ĉiujn vortojn kaj ununura vorto kiu povas eliĝi la truon estas ĝuste tomato. Se iu respondus uzante iun alian vorton, aŭ ekridus, eĉ nur ekridetus, tiam li malvenkus. La truo eksplodus. La mondo kolapsus. Aŭ inverse. Ne gravas. Gravas kial tomato?

Tomato.

Tial, ke ĝi estas ruĝa?

Tomato.

Tial, ke ĝi estas vera bildo de nia cervo, detala modelo de nia menso?

Tomato.

Kial ne kukumo aŭ kukurbo?

Tomato.

Ja kukumo estas multe pli ridinda kaj drola.

Tomato.

Kaj verda.

Tomato.



Kiu venkis ĉi foje?

T o m a t o !